Boquu isaa suuta gamanaa fi gamasitti gagalagalchee naannnoo isaa do’ate. Namuu hin jiru. Dafaqi illee isaa lachuun toora galee yaa’e.”
********************************
“….Abbaan kee mana hidhaatii erga ba’ee booda obboloota kee barbaacha utuu jooruu Dargiin ‘wanbadee’ gargaarta’ jedhee halkaniin ukaamsee fudhatee, achumaan galaafate. Abbaan kee boqotee waggaa tokko booda mootummaan Dargii kufe. Obbolootni kee waraana Dargii ajjeesanii bosona galan lubbuun jiraachuu isaanii yeroo sanan dhaga’e “ijoolleen koo qe’eetti naaf deebi’an, egaa sichoo nan qabaneefadhe’ jedheen gammade. Garuu akkan yaade hin taane. Abdii argadhu iyyuu yaadni isaanii sammuu koo na gubee halkanii fi guyyaa imimmaan koo dhangalaasa. Egaa barbaacha abbaan kee itti fufi siin jedhe isa kana Dhugaasaa koo” jettee, akka nama ba’aa obaafatee afuura dheeraa baafatte.”
*****************************
“Murtii isaa dhumaa irra ga’uuf sammuu ishii wajiin walaansoo isa murteessaa keessa seente. Biliisee. “Eee…ci! Dabeettii! Kana booda maal eegada? Carraan ati mirga kee kabachiifachuuf qabdu dhiphachaa jiraam. Sii galaa?” ittiin jedhe sammuun ishii. Golgaa saqixee gara alaa ilaalte. Mooraan mana isaanii namoota qophii cidhaa irratti wal qabaniin dhiphateera. “ fiigi! Fiigii! Teellatti hin deebi’in. kaadhu!.” …….“ dhisi lakkii? warra kee qaaniif dabrsitee hin
laatinii!. Ofittoo hin tayinii!” sammuu ishii yaadoota wal faallesaniin darbaa jeeqame. Kan qabattee kan dhiiftu walaalte.
Kakuu jaalalaa ishiin Dhugaasaaf seente ammoo dabaree isaa sammuu ishii keessa naana’e. Laga mi’aa. Bakka Gadaa. Bakka waadaa. Iddoo kakuu. Iddoo bokkuu. Kakuu qabdi. Isaa
wajjin. Dhugaa wajjin. Garuu guyyaan isaa dhiyaachaa jira. Guyyaa warri ishii dabarsanii akka hoolaa ishii gurguran. Imimmaan xiiqii maddii ishii irra toora galee dhangala’e. Bakka jirtu dhaabbattee xiqqoo akka yaadneen tasa jabina guddaan keessa isheetti uumame. Ni murteeffatte. Murtii isa dhumaa. ….. Dallaa mana isaanii gara alaatti baasu irra gargaarsa Magartuun yaabattee gurra isheetti jeette hasaastee waa itti himtee dallaa allaatti utaalte. …. Xiqqoo akka deemteen of irra galagaltee gara mana isaanii ilaalte. Qaroon ishii imimmaaniin waan haguugameef sirriitti itti hin mul’anne. Itti dhiftee osoo hin mamin fiigicha keessaa fuute. Gara fuulduraatti.”
**************************************
« Nu maal hin taanee? Aadaa fi dudhaa eenyummaa keenya ibsu akka jibnu nu taasisan. Aadaa mataa keenyaa akka cubbutti akka lakkoofnuuf nu qaraasisan. Nu maal hin taanee?. Warri nuun kana barisiise ofii isaaniif aadaa mataa isaanii dhaloota irraa gara dhalootatti dabarfachaa jiru. Kana
qofaa miti. Nuti kan keenya erga gannee booda aadaa isaanii akka leelifnuu fi itti jirannu nu godhaniiru. Keenya ka ganamaa sammuu keenya keessaa dhiqanii baasan. Kan isaanii itti waraabatan. Nu maal hin taanee? Safuu!. Birraan garuu har’as yeroo isaa eegatee ni dhufa. Maaltu beekaa aadaa fi
dudhaan keenyas guyyaa tokko du’a mo’atee ka’a ta’aam. »
*********************************************
Dhugaasaan bitaa fi mirga ilaalaa, marshii jijjiiraa harka tokkoon ammoo bilbila gurra isatti qabatee “hadhoo koo hin yaadayin maaloo. Hojii ariifachisaan waan na quunameef gara waajiraa deemuun qabaa. ” ittiin jedhe sagalee sosobbiin.
“Hojichi bor hin ga’uu Dhugaasa. Maaloo kottuu boqodhu!” irra deebitee kadhatte Caaltuun. Sagalee Ishii dhipina keessaa maddu dhaga’aa yeroo Hooteela Raa’ bira ga’u konkolaataan
duduuba isaatii dabartee gamoo fuulee waajira ol-aanaa Baankii Daldalaa Itoophiyaa jiru fuullee dhaabachaa turte, daandii qaxamura irraa kaattee humna cimaan konkolaataa Dhugaasaa karaa fulduraa haleelte. Rukuttaa cimaa kanaan konkolaataan Dhugaasaa of irra gagalagalte.

Copyright © Oliqaa.com All rights reserved